Табиғат мұражайы

Алматы мемлекеттік табиғи қорығында 1967 жылғы 5 қарашада ашылған «Табиғат мұражайы» жұмыс істейді. Мұражайдың жалпы ауданы 120 шаршы метрді құрайды.

Музей залдары

Бірінші зал екі бөлімнен тұрады және екі экспозицияны біріктіреді – шөлейт және таулы ландшафттар. Әрбір экспозиция жергілікті биотоптардың жануарлар мен өсімдіктер әлемін таныстырады. Қызыл кітапқа енгізілген түрлерге ерекше назар аударылған.

Екінші залда «Алматы қорығының жабайы жемісті өсімдіктері» атты диорама ұсынылған. Қабырғаларында «Біздің өңірдің құстары» және «Өсімдіктер әлемі» атты экспозициялар орналастырылған. Жәндіктердің, саңырауқұлақтардың, мүктердің, қыналардың ғылыми коллекциялары, сондай-ақ құстар мен жәндіктердің ұялары шыны витриналарда қойылған. Вестибюльде Қазақстан қорықтарының орналасуы көрсетілген стендтер және Алматы қорығының сызбасы бар.

Музейде 3000-нан астам экспонат жинақталған. Бұл музейдің құндылығы – келушілерді жергілікті табиғаттың биологиялық әртүрлілігімен таныстыруында. Мұнда Іле Алатауының тау жануарларын – қар барысын, аюды, қасқырды, қабанды, еліктерді және тау ешкілерін көруге болады. Сонымен қатар шөлейт аймақтардың өкілдері – киік, құлан, қарақұйрық бар. Құстардың да көптеген түрлері ұсынылған: бүркіт, дала қыраны, сақалтай (құмай), ақбас құмай, үкі. Мұнда тропикалық және жергілікті көбелектер, қоңыздар, өрмекшілер, сирек, дәрілік және улы өсімдіктер стендтері, 200-ден астам саңырауқұлақ түрі, мүктер, қыналар, құстар мен жәндіктердің ұялары қойылған.

Мұнда келушілер Алматы облысының биологиялық әртүрлілігі жағынан ерекше аймақ екеніне көз жеткізеді. Салыстырмалы түрде шағын аумақта Жердің Солтүстік жарты шарына тән дерлік барлық табиғи аймақтар кездеседі. Шөл және шөлейт жерлер біртіндеп далаға ұласып, одан әрі таудағы жапырақты, аралас және қылқанжапырақты ормандарға жалғасады. Альпілік шалғындар (жайлау) тундраны еске түсіреді, ал таулардың 3,5 мың метрден жоғары биіктігінде Арктикадағыдай мәңгілік қар мен мұз аймағы орналасқан. Экскурсия барысында келушілер жазық құмды шөлдерден бастап биік таулы жартастар мен мұздықтарға дейінгі бүкіл өңірдің флорасы мен фаунасы туралы толық мәлімет алады.

Музей келушілері

Музей келушілерінің 95%-дан астамын мектеп оқушылары, колледж және жоғары оқу орындарының студенттері құрайды. Жыл сайын табиғат музейінде шамамен 300 дәріс-экскурсия өткізіліп, оған 4000-ға жуық адам қатысады. Музейде өткізілетін дәрістер мен әңгімелер облысымыздың флорасы мен фаунасының қазіргі жағдайы, өңірдегі қоршаған ортаны қорғау мәселелері, мектеп бағдарламасына сәйкес тақырыптық сабақтар және басқа да мәселелерді қамтиды. Музейде мектеп оқушылары экологиялық ағарту бөлімінің қызметкерлерінің көмегімен әрбір гүлге, жәндікке немесе көбелекке қамқорлықпен қарауды үйреніп, айналасындағы табиғаттың нәзік сұлулығын түсіне бастайды.

Музей қызметі

Музейді тамашалаған экскурсияға қатысушылар қажетті теориялық білім алады, кейін ол білімдерін экологиялық соқпақтар бойындағы экскурсияларда бекітеді. Экскурсиялық-ағартушылық қызмет ғылыми-танымдық және экологиялық экскурсияларды ұйымдастыру арқылы жүзеге асырылады. Сонымен қатар табиғатты қорғау және қорық ісі мәселелері бойынша оқу-ағартушылық, насихаттық, көрме, музейлік, мәдени-ағартушылық және басқа да жұмыстар жүргізіледі. Жыл сайын экологиялық ағарту бөлімі жаппай экологиялық іс-шаралар, семинарлар, жазғы эколагерьлер өткізеді, сондай-ақ табиғат музейінде және қорықтың экологиялық соқпақтарында ғылыми-танымдық экскурсиялар ұйымдастырады.

Музейдің жұмыс кестесі

Музейдің жұмыс уақыты: 09:00 – 17:00
Демалыс күндері – алдын ала өтінім бойынша жұмыс істейді.

Музейге кіру бағасы

• Ересектер үшін – 250 теңге
• Студенттер үшін – 200 теңге
• Оқушылар үшін – 100 теңге